Размер:
AAA
Цвет: CCC
Изображения Вкл.Выкл.
Обычная версия сайта
Муниципальное бюджетное учреждение культуры
«Ижемская межпоселенческая клубная система»
8(82140) 94-9-00
Обратная связь

169460, Республика Коми,
с. Ижма, ул. Советская, д. 49

rdk2009i@mail.ru

26.03.2018

«Чужан кывйöн ме лолала, ола, чужан кыв – менам олöмлöн мич»

Татшöм кыпыд висьталöм улын мунiс концерт Мохча культура керкаын рака тöлысьын 18 öд лунö. Тайö чукöртчöмсö ми сиим Коми Республикаын Культура волы и енбиа культура кыпöдысьяслы, кодъяс таво пасйöны тöдчана чужан тшупöдалун.

Медводдзаöн петкöдлiм  коми кывбур гыжысьяслысь сям. Вошйим Николай Щукинлы сиöм серпассянь, кöнi «Теремок» котырö ветлысьяс зонкаяс да нывкаяс петкöдлiсны серамбана кывбуръяс. Николай Александрович, посни челядь гижысь, таво гожöмын кутас пасйыны 85 ар. Сы мында жö во сайын чужлöма Альберт Ванеев,  йöзкостса  кывбур гижысь. Сылысь «гажа кад йылысь» кывбуръяс лыддисны  Лена Канева, Катя Забоева и Лиза Батманова.  Водзö гажöдiсны «Бирюза» сьылан котырö ветлысьяс «Катшасинъяс» шылöдагижöдöн.  Шылöдыс Александр Осиповлöн, комиын медводдза шылöда гижысьлöн,   кывъясыс Серафим Поповлöн, медводдза йöзкостса коми кывбур тэчысьлöн.  Таво «кык енбиа мортлöн, кык ыджыд сьöлöма ёртлöн», чужанiнсянь тырö тшупöдана пас:  95 ар да 105 ар. А 130 во сайын  чужлöма Виктор  Савин, драматург, кывбур да шылöд тэчысь. Сiйö  гижлiс  коми государственнöй  кыплысь текст. Сы нимöн пасйöма Сыктывкарса Республиканскöй  драматическöй   театр.  Йöзнимыс - Небдiнса Виттор, сылысь гижöдтор «Олi- вылi сьöд вöр шöрын» лыддьис  Максим Вокуев. Таво тырö 60 во  Коми Государственнöй опера  да  балет  театрлы. Содтöд пасйим сьылысьöс, кодi чужлöма 95 во сайын да кодöс шулöмась  «Миян коми колипкай». Сiйö Валентина Есева, Коми АССР-са нималана и нимйöза артистка. Сэтшöм жö шедöдöм ним  нуö коми драматург да ворсысь Василий Леканов, кодi чужлöма нэм сайын.  110 во сайын чужлöма медводза кужана коми режиссер Борис Семячков.  А Галина Лыткина     РСФР-са нимöдана и  Коми АССР- са нимйöза ворсысь, чужлöма 90 во сайын. Нимöдiсны кужысь енбиа артистъясöс аслыснога ворсысьяс Нина Ануфриева да Алексей Рочев ичöтик шмоньöн.

Изьва районын тавося во сиöма кельчиюрса аслыс нога шылöд гижысьлы да кывбур тэчысьлы Генриетта Сусловалы. Таво сылöн ыджыд  тшупöда пас -70 ар.     «Сьöкыд лунъяссö ачым и берта, зато сöстöм и сöвесть, и лов» - татшöм кывйитлöс  улын мунiс сылöн олöмыс. Генриетта Павловналы, уна челядя мамлы, сиктса велöдысьлы да гудöкöн ворсысьлы  кага видзан керкаысь  школаöдзса челядь сиисны ассьыныс шылöда петкöдчöм.  Посни челядь сьылöм да ворсöм бöрын пасйим  тöдчана ыджыд тшупöдалун. Йирым тöлысь кызь öти лунö сюрс  öкмыссё кызь коймöд воö  Мохча сиктын чужлiс Советскöй Союзса Герой Андрей Гурьевич Хатанзейский. Миян вежöрысь сылöн подвиг некор «оз вун». Татшöм ним улын кывбур да  гудöкасьысь солдатлöн радейтчöм йылысь сьыланкыв вöлi сиöма изьваса геройлы.                                                                                                                                  

Лöсьыд сьыланкыв бöрын казьтыштiм вöйна вывса участникöс, гöрд  звезда ордена кавалерöс, Глеб Васильевич Семяшкинöс.  Сiйö Коми АССР-са нимöдана  вöчысь,  аслыснога шылöда гижысь, 70 во сайын  артмöдлöма  изьваса йöзöдан сьылан котыр.

Сылысь шылöдагижöд «Мича ижемка» сьылiс Зинаида Витязева.

Россияын тавося воыс  йöзöдöма театр ним улын. Медводдза роч театрын уджалысь: велöдысь, ворсысь и пуктысь Константин  Станиславский чужанлунсянь тыртiс 155 ар. Сiйö шулiс «Керкасö тэчöны öти кирпичсянь, а рольсö – неыджыд вöчöмсянь». Сылысь висьталöмсö олöмö пöртiс  тöдчана роч кинопуктысь  Леонид  Гайдай,  кодлы  эськö таво тырис  95 ар. Сы мында  жö во кутас тыртны Мöскваса  драмтеатр Моссовет ним улын. Сiйöс  артмöдлöма гижысь  да пуктысь Сергей Прокофьев. Театр нима во  пасйим неыджыд  петкöдчöмторйöн. Кыпыд шмонь  бöрын «Фантазия» сьылан да йöктан котырö ветлысьяс шылöда серпасöн  «Уна блин ме пöжала» казьтыштiсны  йöввыв вежон. Сiдз жö найö  висьталiсны небыд кывъяс морт чужтысьлы – мамлы да батьлы. Ксюша Прелова висьталiс  кывбур «Козин», кодöс гижлöма Зоя Рогова, сiйö  чужанлунсянь  тырiс сё ар.

Став мирса кывбур лун кежлö, кодöс пасйöны  март тöлысьö кызь öтиöд лунö,  ми казьтыштiм  роч  гыжысьясöс: Николай Добронравовöс, кодлы  таво кутас тыртны 90 ар, да Василий Лебедев – Кумачöс, кодлы эськö таво тырiс 120 ар. Найö  кыпыд  гижöдъясöн «Лача» (Надежда) да «Гажа тöв йылысь  сьыланкывйöн» (Песня о весёлом ветре) - переводыс Александр   Некрасовлöн,   сьылiсны Елизвета да Елена Каневаяс, а мöд участвуйтысьяс новлöдлiсны кытш. Та вылын и эштöдiм  кыпыд петкöдчöм, кодöс нуöдiс Людмила Петровская. Сылысь  висьталöмсö мичмöдiс экран вылö тэчöм фотографияяс (презентация), кодöс артмöдiс Елена Канева, а сценарийсö дасьтiс Галина Рочева.

Ми ёна  ыждöдам коми кыв, сылысь лун пасйöны, урасьом тöлысь кызь öтиöд лунö. И нёльöд во чöж тайö лунсö Мохча культура керкаын ми пасйам  гажöдчöмöн «Чужан мулöн серпас». Ми  пыдди  пуктам чужан кыв, ас му, тыр - бур олöм – вылöм.                                                                                                            

                             Галина Рочева Мохча культура керкаын художествоа руководитель.

 

 

 

 




Возврат к списку